I. Eiroa / LA VOZ, 05 de septiembre de 2015.
Snow chámase o gato dun sanitario e veciño de Burela que pasou case todo o mes de agosto buscando á súa mascota.
Aló polo día seis do mes pasado decatouse de que faltaba. Levárana á casa que restauraron en San Román de Vilastrofe, onde lle acondicionaron o cabazo, habilitándolle unha gateira para que puidera entrar e saír cando lle apetecera.
A touro pasado souberon que o gato marchara da casa. Algúns veciños cren que saíu detrás dos amos cando estes retornaron a Burela no coche, pero o minino parou antes de chegar a destino. Quedouse xunta o cemiterio novo de Burela, na Puída, onde a súa presenza, varios días seguidos, lle chamou a atención a un veciño de Madrid que pasaba por alí. Pensando que estaba perdido, recolleuno e levouno a unha clínica veterinaria burelense, á espera de que lle aparecera o dono. Transcorridos uns días, visto que ninguén o reclamaba, o madrileño recolleuno e levouno para a súa casa de Meco. Mentres tanto o seu lexítimo dono seguía buscándoo; a familia xa pensaba o peor: matouno o raposo. Contactaron cunha protectora de animais que, mira onde, lle sigue o rastro e conseguen localizalo en Madrid. Avisan ó dono: «Busca en Google "gato perdido en Monte Castelo", a ver si es».
Efectivamente, alí estaba a foto de Snow, posando moi espanzurrado no xardín da súa nova casa. Contactan entón co veciño de Madrid e este cóntalles a historia. «¿Lo puedo recuperar?» pregunta o dono.«¡Cómo no!» lle contesta. E ponse en marcha o operativo para devolver a Snow ó seu fogar. Encargouse de traelo un cuñado que vive en Bilbao e que non puxo obxección algunha en «achegarse» ata Madrid a recoller ó prófugo e traelo de volta a Burela onde aterrizou, según nos contan, como se non tivera pasado nada: espreguizouse moi contento e foise directo ó seu rincón, á cesta de capota na que adoita repousar.
No hay comentarios:
Publicar un comentario